金融嘅嘢我識條鐵咩，不過最新聽到本報財經名家孫柏文喺網台節目預言，有一間本地銀行24個月內會出現擠提，真係心驚驚，其實「支爆」都傳咗好耐，唔單止中國，俄羅斯、沙地阿拉伯等產油國都問題多多，利記銀行、獅子銀行股價跌到五癆七傷，個勢都幾令人擔心。
車路士原本有油王班主阿巴莫域治呢支大水喉支持，打佢工都幾風流；不過油價大跌，有報道講阿巴上個月已經唔見五億鎊，就算身家有40幾億鎊，未算蝕入肉，但都唔可以好似以往咁風流。車路士一月只搵得柏圖呢啲舊電池救亡，已經幾令人擔心，上年12月炒摩連奴後，一直由老友軒迪克暫代領隊至今季尾，但新領隊人選傳嚟傳去都只聞樓梯響，似乎大家都唔想上阿巴隻沉船。
講真要打油王工做車路士領隊，堅忍個性真係唔少得，球隊成績唔好固然要照肺，阿巴自己鍾意咩球星，好似費蘭度托利斯咁就天價買返嚟安排你用。阿巴都算臭名遠播，要搵好領隊真係難。嗱！𠵱家就有好領隊等佢請，就係即將離開曼城嘅比歷連尼（圖）。講真當一間公司講明你做到六月就炒你，你都輕則不滿，重則發爛啦。比帥都叫仲盡忠職守，呢兩場聯賽輸波都係非戰之罪，而且帶曼城拎過冠軍，我係阿巴就請佢喇，咁對曼城呢場雙藍大戰就有好戲睇。
文：牽牛