1月新增貸款2.5萬億元人民幣數字出爐之後，A股升、H股跌，原因係人民幣供應相對美元進一步增加，追逐A股嘅人民幣供應更加無限，但追逐H股嘅美元供應繼續有限，所以A股指數將會繼續跑贏H股指數。
如果拼圖嘅話，就會發現家陣恒指同舊年10月初嘅走勢頗為相似，只不過反彈動力相對舊年10月為弱；如果睇H股指數，走勢更明顯差過舊年10月。如果閣下本身唔睇好A股，就更加唔應該睇好H股住。
另外，觀察過去10年月線圖，恒指連續超過3個月出現陰燭下跌趨勢嘅話，若然接住出現月線圖陽燭，並不能即時確認見底，原因係往績顯示，下個月變番陰燭嘅機會相當高。換句話說，如果今個月恒指頂得住，從低位反彈，出現月線陽燭，下個月應該會變番陰燭，下試低位，整固完畢先有機會向上。所以，想撈貨嘅話，不妨等到3、4月先至再諗清楚，唔使急。撇除H股、銀行、中港資產股，最好嘅股份選擇有兩種，第一，係產品喺海外有競爭力嘅股份，第二，已完成全購過程、股價仲未爆上嘅殼股。
第一類股份當中，創科（669）同新秀麗（1910）本來係唔錯選擇，但係長線技術走勢先啱啱轉弱，綜合埋上述恒指技術分析，要撈貨作為長線投資，等同忍，係最佳策略。
晉佳
https://www.facebook.com/advanceguy1/