中超又買星嘞！河北華夏幸福噚日宣佈，由巴黎聖日耳門（PSG）簽入阿根廷國腳前鋒拿維斯（前），同謝雲奴雙翼齊飛！30歲嘅拿維斯本身今夏同PSG約滿，所以佢嘅轉會費只係550萬歐元（約4,800萬港元）。不過，另一阿根廷球星泰維斯就嫌錢腥，拒投中超。據報，上海上港向泰仔開出一份肥約，只要佢嚟踢10個月就可袋2,500萬歐元（約2.2億港元），即係月薪超過2,000萬港紙。不過，泰仔對小保加感情深厚，決定留低踢阿甲。