土耳其因為舊年11月喺領空擊落俄羅斯戰機而令兩國關係非常緊張，俄羅斯隨即展開軍事同經濟報復行動，效力莫斯科火車頭嘅俄羅斯中場泰拉索夫更加用行動支持總統普京，令事件火上加油。火車頭周二喺歐霸32強首回合作客輸畀土超費倫巴治0:2，佢哋球員賽後向粉絲鼓掌致謝，但泰拉索夫除咗件波衫，騷出佢印有普京個樣嘅底衫，仲寫住「最好人嘅總統」（圖）。事後佢話：「我好尊敬普京，於是我決定用行動嚟支持佢。」佢咁做即時辣㷫土耳其人民，搞到火車頭架隊巴賽後俾人掟玻璃樽。歐洲足協嚴禁球員喺場內表達政治意見，所以泰拉索夫同火車頭都應該有手尾跟，面臨罰錢同閉門作賽等嘅處分。