今年令維園年宵市場水洩不通嘅《100毛》攤檔，推出嘅一套五妖，包括「六八犬」、「龍蝦精」、「鼠王獸」、「麒麟怪」同「鍾樹妖」大賣，而盤菜瑩子同方健儀就話至愛係「鍾樹妖」。咪以為事件主角民建聯鍾樹根會懷恨在心，佢噚日話「鍾樹妖」證明政治諷刺唔只有得做，仲可以賺大錢，毫不介意被惡搞，更大讚《100毛》夠晒創意！
「政治諷刺可賺大錢」
《100毛》絕非首次揶揄Tree根，之前就為佢度身訂做過《明張目膽》呢首主題曲，年宵公仔「鍾樹妖」明顯係錦上添「根」，令Tree根不得不表謝意，噚日喺立法會致謝動議中利用寶貴嘅發言時間，大讚《100毛》夠創意：「據說呢個公仔賣斷市，反映政治諷刺都可以變成賺大錢嘅生意，背後正正就係創意。」
Tree根之所以提起《100毛》，因為致謝動議觸及創意產業，而佢係民建聯相關範疇嘅發言人（無錯，佢曾經話佢係第一代IT人），佢話每年年宵都係發展創意產業嘅平台，中、大學生都會設計自己嘅專屬產品推出，「有時一個簡單而瘋狂嘅念頭，分分鐘可以發展成市值百億嘅企業」。
查實佢平日創作咁多四字詞，兼有獨一無二嘅英文文法同發音兼串法，都為創意工業立下唔少汗馬功勞；《100毛》做得出色，都要多得呢個「前輩」提供靈感喎！
李八方
mailto:[email protected]