立法會𠵱家有兩個準爸爸，分別係工聯會郭偉強同民建聯陳恒鑌（Ben），原來仲有人都好恨做老竇，佢就係民建聯漁農界立法會議員何俊賢（圖）喇！高佬賢2014年底結婚，一直心急造人，自言已經好努力，之不過呢，都要做足事前準備功夫。大家唔好諗錯隔籬，八方講緊係佢叫太太去睇中醫，調理身體，增加成功機會。高佬賢同八方講，之前請教過「成功例子」阿Ben，對方介紹咗個喺葵涌執業嘅中醫畀佢，𠵱家太太每星期都會去睇，睇嚟早生貴子指日可待！至於想生仔定女？高佬賢就話順其自然冇乜所謂喎！