這晚係二三線騎師天下，頭三場巫斯義兩WIN及羅理雅一捷。到第四場四班1650米，輪到華將威，今次仲要係一Q返，主角分別係吳嘉晉同鄭雨滇。
吳嘉晉夥拍師傅告東尼旗下的「開心駿馬」減五磅出賽，閘前受落飛黨狙擊，跌到4.7倍第三熱門開跑，四歲馬1檔起步有恃無恐，就此一放絕塵，吳嘉晉取得個人猴年第一Win，組合獨贏A2派23.5元，告東尼則連續第二個賽日建功，兩師徒對上一次合作贏馬，係去年11月29日勝出「萬事勇」。至於「開心駿馬」季內出道四戰兩捷，兩次贏馬都跑谷草一哩，性能已基本定型。
今場跑第二係冷馬「優勝」，鄭雨滇留放一絕，可惜畀「開心駿馬」走甩咗，追足半條直路始終難越雷池半步，呢條猴年夜賽首條華將Q有50倍分頭。三、四名分別係半冷「事必獲利」及「大勇士」，四重彩派13萬幾。
其實「開心駿馬」今場贏得有運，因為三大高手座騎有嚴重意外，中段雷神「創基寶」疑似跑跛腳急劇墮退，令莫雅「驍武」大力勒避險墮馬，「驍武」勒避時嚴重阻到柏寶之「勝利威」。結果「創基寶」被拉停，「驍武」及「勝利威」則半拉停慢跑過終點。三大高手座騎包辦最後三個名次。