歐聯16強首回合賽事喺周二開打，焦點大戰巴黎聖日耳門（PSG）迎戰車路士，結果PSG由伊巴謙莫域先開紀錄加上後備入替嘅卡雲尼絕殺，以2:1贏波先拔頭籌。年屆34歲嘅伊巴繼續霸氣十足，近九場代表PSG上陣有八場都有波入，賽後仲換到兩件波衫，真係搶晒鏡。
排人牆遮鼻保靚樣
伊巴喺今季仍然係PSG嘅主要入球來源，教練白蘭斯喺上周六場法甲將佢收起，今場歐聯先上陣果然有料到。PSG迎戰車路士全場有20次射門，其中伊巴六射三中，包括喺39分鐘主射罰球，省中車仔中場約翰米基爾改變方向入網；完半場前約翰米基爾將功補過扳平，攞到寶貴作客入球。踢到78分鐘，卡雲尼後備入替後四分鐘，接應迪馬利亞妙傳單刀窄位搞掂，為PSG奠定2:1勝局。教練白蘭斯賽後都話今場係PSG今季踢得最出色嘅比賽之一。
伊巴喺場上進攻威脅大，佢喺今場波亦有其他搶鏡地方。完半場前車路士由韋利安主射罰球，有份排人牆嘅伊巴好緊張咁掩住自己個鼻，佢個鼻生得咁高，畀個波省中都幾大件事；可憐嘅係唔算高嘅馬高華拉堤，原本想幫手排人牆，點知被隊友莫達嫌棄推開咗，好冇癮咁走開。完場後伊巴同曾經喺巴塞隆拿做過隊友嘅柏度洛迪古斯換波衫，之後又再攞埋韋利安嗰件，咁韋利安換咗乜嘢返更衣室呢？
軒迪克首敗：PSG真係世界級
伊巴帶領PSG喺歐聯16強先拔頭籌，繼續喺四條戰線爭標；反觀車路士嘅所謂王牌夏薩特表現就真係麻麻，仲傳話PSG想以天價買佢過嚟，其實伊巴仲咁當打，不如同佢續約好過喇。上任後終於首逢敗績嘅車路士暫代領隊軒迪克，對晉級形勢仍然樂觀：「輸波永遠都唔會係好事，但比賽仲有次回合要踢，喺作客情況下入到一球亦好重要。PSG真係好強，就算喺後備席都係高手如雲，連下半場入替嘅都係世界級球星。」另外，一向麻煩多多嘅車路士球迷，喺球隊扳平之前喺看台一度出現騷動，場上警察要出動催淚彈，搞到班球迷連扳平一球都睇唔到。
周二另一場歐聯16強，賓菲加踢到補時由首席射手莊拿斯干卡維斯建功，以1:0小勝客軍辛尼特。