電影《非常盜》（Now You See Me）2013年上映時非常賣座，以魔術作為題材風靡全球，片商開拍續集《非常盜2》（Now You See Me：The Second Act）已定今年6月10號喺北美上映。除咗原班人馬謝西艾辛堡（Jesse Eisenberg）、活地夏里遜（Woody Harrelson）、Dave Franco、麥克雷法路（Mark Ruffalo）之外，續集仲加入咗「哈仔」丹尼爾拉德克里夫（Daniel Radcliffe）、Lizzy Caplan同埋周杰倫。
舞動甫士型爆
電影喺上年拉隊到澳門取景，月前已公開首個長約一分鐘嘅預告片，除咗謝西艾辛堡等人上演魔術表演，麥克雷法路喺澳門亦有打鬥戲份，但就唔見周杰倫，有傳佢只係客串扮演古董店老闆。不過，噚日公開一系列宣傳海報終於解開謎團，同時推出美版及內地版，唔止有齊幾位主角嘅單人照，周杰倫亦以魔術師造型亮相！
幾位主角喺藍色燈光折射到玻璃鏡面下，盡顯魔術奇幻世界，周杰倫擺出型格舞動甫士，而演學院派魔法師嘅丹尼爾就單手飛起啤牌，有如魔術老手一樣。時隔三年，神秘「天眼」再次出現喺海報右下角，上集每位魔術師都收到一張啤牌邀請卡，「天眼」標誌似暗藏玄機。
撰文：馮仁昭