新世界發展（017）主席鄭家純（純官）身形圓碌碌，估唔到佢係鍾意游水㗎喎！農曆新年香港凍冰冰，佢就去咗熱辣辣嘅馬爾代夫享受陽光與海灘。
純官噚日現身主持新世界特別股東會，其實佢平日膚色都黑黑哋，噚日望落似係再曬黑咗，又相當精神，叉足電咁款。原來佢真係啱啱同家人去完馬爾代夫「同陽光玩遊戲」，佢仲爆咗句「我鍾意游水㗎」。
估今年樓價跌10%
老實講，一直冇點聽過純官鍾意做運動，最多聽聞恒大地產（3333）老闆許家印會同佢玩鬥地主，另外佢都有養馬仔。根據馬會資料，純官養過10匹馬，現役馬匹就有「大寶庫」與「大寶藏」，成績一般。
當然，純官最大嘅嗜好應該係賺錢喇。今年新世界諗住推7個新盤，合共2,900伙，實行快快趣賣晒佢。純官話，唔係怕睇唔通後市，只係拖住唔賣，要計利息與管理成本，自然想快啲甩晒出去。
每次問佢樓價走勢，佢例牌都係好似猜枚咁「五個、十個」，噚日就估今年樓價可能跌10%，再大跌機會唔高，因建築成本一路升，住宅又有需求，好難跌得去邊，地產商又冇理由蝕住賣樓云云。佢順勢建議政府係時候諗吓減辣，指「𠵱家樓價跌，喺適當時候取消都係好事嚟」。
對於近年多咗內地地產商同佢哋鬥搶香港地皮，純官都承認，的確係多咗競爭，但對方都要睇住盤數，唔會蝕住本去做。佢又重申，之前賣咁啲內地項目，只係想換馬，買其他內地一、二線城市項目。
李華華
mailto:[email protected]