「5‧22」沙田馬場上演一級賽遮打盃，嗰日除了下午有呢場重頭戰外，晚上相信好多馬圈人士同賽馬傳媒都會好唔得閒，事關要去參觀一場婚禮。
原來告東尼個姪，即練馬師告達理仔仔Martin告卓賢，已決定同模特兒女友Paris陳穎，喺個日結婚。
告卓賢說：「我嘅心情好興奮同好緊張，我哋都籌備一段時間，現在來到結婚一刻，係人生另一個階段。」
Martin份人似足父親告達理沉默寡言，Paris都話佢份人睇落好內向，但其實好細心。Paris說：「佢個人有好多優點，好細心，好take care我，雖然佢個表情好似冇乜笑容，但同你熟咗會有好多嘢講。」
Martin自己亦係練馬師，不過就喺新西蘭練馬，而Paris就百足咁多爪，既係model及瑜珈導師，亦係賽馬節目主持，又搞網上餅店。對於自己個婚禮，Paris亦有要求。
「結婚當日wedding cake(結婚蛋糕)，desigh方面我會自己設計。我唔鍾意真花，因為覺得會終有一日枯萎，我會喺wedding cake上面用一啲糖皮做一啲花，放喺上面。」
告達理有隻短途惡馬叫「陽明囍囍」，實力強勁，如果安排當日下午出賽贏咗，晚上又娶新抱，咁就真係喜上加喜咯！