今日係農曆年十一，打工仔應該已經歸位，返晒工喇啩。噚日WhatsApp周圍流傳一個羅列本港各大銀行派幾多開工利是嘅message，求證後發現滙豐最孤寒，前年好似有金幣朱古力，今年朱古力都冇，佢哋又貫徹「鬼仔性格」，冇派利是。
其實開工利是都係講意頭，幾多錢冇乜所謂，滙豐控股（005）決定唔遷冊，留喺英國，亦堅持唔派開工利是，反而阿仔恒生銀行（011）仲有跟番中國人習俗，派廿蚊利是；壞消息纏身嘅渣打香港，都人人有利是，金額唔同，最多有300蚊。中資銀行就好豪爽，據聞信銀國際嘅開工利是有2,000元。
照咁睇，似乎喺大行之中，係得滙豐冇派開工利是，佢哋過年前已經話凍薪（後來唔凍），搞到啲同事唔多開心，𠵱家連利是仔都冇，唉！