靚女L坐的士來左丁山家拜年，的士司機問佢：「小姐，旺角暴亂你知幾多呀？」靚女L答：「都係睇報紙同有線電視新聞重播又重播二十幾次嘅報導啫。」司機又謂：「有可能有陰謀㗎！我有好多行家當晚在旺角，佢地講砵蘭街有小販擺賣，食環署職員有在場，但唔趕人走，隻眼開隻眼閉，每逢新年都係咁嘅嘞，但十一點鐘左右，突然間見到有另一批小販出現，搞亂秩序，於是食環署人員去趕人，之後就爆大鑊。嗰種插隊另類小販都唔知係乜嘢人，你估係本土派搞嘢吖，還是政府無間道呢？」靚女L聽得好唔舒服，只好回答：「我點知呀，一個政府點會特登煽動搞暴亂㗎？匪夷所思噃？」
靚女L與左丁山各自恭喜發財之後，講起此事，猶自震驚，唔相信特區政府嘅公信力竟然如此低落，街頭陰謀論如此盛行，靚女L乃留學美國之善良女子，自小有父母呵護，在中環係中級OL，比較純真，幾難領略世間嘅奸狡權謀。左丁山問過學生豪，大學生點睇，學生豪話一面倒大罵黑警打人，邊個夠膽在網上講一聲暴民，就會受到網上圍剿。啲大學生都幾天真，2012年時一面倒支持梁振英，鄙視富二代，現在大概發覺受騙嘞，又一面倒狂踩689，連佢新年不放假留港都視為早有預謀，未免反應過敏。
左丁山唔信「政府無間道」之陰謀論，並非擁護建制派，而是唔相信特區政府有此策劃能力，夠膽犧牲前線警察及整個警隊。當晚騷亂開始時，警察佈防力量薄弱，約六個交通警察幾乎被圍毆，一名交警情急之下，向天鳴槍兩響，如當時警察與掟磚頭人士有死亡嘅話，後果不堪設想，有邊個特區領導膽敢瞞住盧偉聰而在幕後策動，刺激本土派產生暴亂呀？左丁山點都唔信。事實上，在任何偶發性騷亂事件，當警方力量薄弱，有人首先掟磚頭、放火燒雜物之後，甚麼事情都可以發生。緊急時期，電光石火之間，交通警察怕死，邊度仲會諗到「禁止向天開槍」呢一條規矩？有人話相比外國，掟磚頭不算激烈行為，但如果佢有外國經驗，美國咁民主講人權嘅國家，在同一情況下，警察隨時會向示威者開槍，絕不手軟。喺美國，示威掟磚頭唔算激烈，警察殺人亦唔係稀奇，在香港就千萬不可引入呢類觀點！