好多大人同小朋友都鍾意駕駛嘅感覺，Tesla創辦人Elon Musk肯定深明此道，新近推出畀小朋友玩嘅「Tesla Model S for Kids」兒童電動車，每部499美元（約4,000港元），今年5月開始付運。
呢款預售中嘅兒童電動車，使用更換式電池，一嚿電拎咗去叉電，可以用住另一嚿去玩，叉電時間較大車短，叉完電可以駕駛3小時，適合3至8歲，體重81磅以下嘅小朋友玩。車身顏色可以選擇紅、藍或黑，車頭仲可以放玩具，真係好啱細路仔用。
睇條宣傳片，部車真係型到震，只可惜香港土地問題嚴重，唔似外國咁，周圍有大公園，或者本身屋企地方夠晒大兼有花園，香港家長買入呢部車畀小朋友，睇怕都冇乜地方可以成日玩。