NBA明星賽曲終人散，小記唔使成日遊走喺酒店同加拿大航空中心，梗係去outlet行吓執平嘢啦！
司機叔叔用咗個半鐘頭，由多倫多載我哋去到尼亞加拉嘅Outlet Collection，呢度乜嘢牌子都有，包括高檔啲嘅Coach、Tommy Hilfiger等，小記呢排成日行「一剔牌」，有啲厭倦，所以去咗「三間牌」尋寶。第一時間衝咗去睇波鞋，可惜只屬普通貨色，諗住去第二個牌子，點知有個行家話：「呢個價喺香港買唔到，一定要入貨。」小記於是去睇吓，嘩！堅平。一件長袖衫原價80加幣，減至39.95加幣後仲有六折，即係約27加幣，160港元有找！領隊買咗件羽絨，連稅折實74.5加幣，即係420港紙，平到笑。
之後成團人轉場去Canada One Factory Store繼續買，最平都係三間牌，今次仲有拜恩件湖人波衫㖭！原價120加幣，減至99.92加幣，連稅約113加幣，即係636港紙。小記掙扎咗好耐，最後決定唔買，免得買太多俾屋企人鬧。