現年70歲嘅「沙皇」李國章早前喺爭議聲下出任港大校委主席，但每次出席公開場合，依然紅粉緋緋，無他，一切都係因為有愛情滋潤嘛。
去年11月，喪妻兩年嘅李國章被爆戀上年約40歲、有dbc法拉之稱嘅香港數碼廣播公司市場推廣部主管何婷媚（Monique Ho），更有傳二人已進入談婚論嫁階段。
父女戀不避忌拖手攬腰
雖然呢段「父女戀」年齡相距逾30年，但愛得相當癡纏。噚晚7點半，八方同事就見到李國章揸車載女友現身跑馬地，佢十分小心，途經便利店時先放低女友，Monique落車買咗兩條雪條後，再上車會合男友。二人再兜咗陣，就將車泊喺山村道，再步行去聚文街，途中二人不避忌拖手、掃背、攬腰，最後佢哋仲拎住袋雪條齊齊步入疑似係女方嘅寓所，位於跑馬地嘅帝華閣。
一個鐘之後，約晚上近9點，兩人再落樓，女方換咗件外套，蹺住男友去隔籬街攞車，李國章開埋車門畀女友上車，好有風度，之後直返沙皇位於半山嘅寓所。
採訪、攝影︰黃曉程 朱志聰 徐錦池
李八方
mailto:[email protected]
