寨卡病毒喺巴西肆虐，英國女子七項全能選手恩妮絲，同埋美國女子足球隊門將蘇露講明要睇情況，先至決定今夏參唔參加里約熱內盧奧運。不過，身在巴西參加里約網球公開賽嘅西班牙網球手拿度（圖）同費利就大無畏，話一定會去玩奧運。拿度咁講：「我唔怕寨卡病毒。講真，我唔知呢種病毒對巴西有幾大影響，但我見到呢度啲人生活正常，好似平時咁去行街、去海灘玩同去餐廳食飯。」至於費利就話：「我都唔怕寨卡病毒。我會做一啲預防措施，例如係着長袖衫同埋長褲。」里約熱內盧奧運會喺今年八月五號展開，玩到21號為止。