銅鑼灣兩大業主希慎興業（014）與九倉（004）喺區內商場互相競爭搶客，估唔到就連醒獅賀歲都安排喺噚日同日舉行。論場面與人氣，九倉稍勝一籌。
希慎嘅醒獅表演噚日嘅朝早約11點，喺銅鑼灣利園一期行人道對開舉行，希慎行政總裁劉少全主持，旗下寫字樓租戶Tod's Group與雅虎香港都有代表出席。
九倉就下午1點半喺時代廣場露天廣場舞獅，時代廣場總經理梁淑敏、娛藝院線（UA）同阿里巴巴等租戶代表，一齊為醒獅點睛。
華華睇晒兩場醒獅表演，雖然同樣精采，不過時代廣場對開就有近千人圍觀，場面盛大，財神出動派揮春嗰時，仲有過百市民爭住接福。希慎嗰邊，可能因為朝早舉行，圍觀市民唔多。