愛因斯坦一百年前提出嘅「重力波」，早前終獲驗證存在。估唔到政界原來都出現一位「重力波」，原來係財委會主席陳健波，佢早前喺財委會「無畏無懼」剪布兼搞「抗拉布工作區」，成為建制派重炮手，據聞獲唔少同僚拍手力撐。
立法會「六散人」噚日同傳媒團拜（圖），召集人廖長江大爆陳健波呢個新朵，在場「重力波」聽到都有啲尷尬！查實陳健波又唔係一味重炮，佢透露近日已同政府建議，以雙線形式審議財委會同工務小組合共70幾項撥款，想將項目分為有爭議性及冇爭議性，分日審議，立會法律顧問已經話咗冇問題，但政府就話，要搞掂埋高鐵追加撥款先再諗，仲引述政府有幾大考慮，一嚟覺得爭唔爭議都可能爭議一餐，另亦唔想向泛民跪低，兼且驚雙線後有議員始終會拉布。
陳健波引述泛民傾向支持，反而建制有保留，個人只希望今次特事特辦，以免未能審議嘅項目喺今屆會期結束後，又要重頭嚟過。
許偉賢攝