海洋公園大熊貓盈盈去年懷孕後，埋門出現母體吸收最終「食詐糊」。經過休養後，園方決定今年唔會再送盈盈返四川參加繁殖計劃，而會留港，並將上次去四川學到嘅「學以致用」，希望同樂樂可以開枝散葉。
八方聽負責大熊貓飼養嘅人員講，由於大熊貓交配姿勢係「跨爬式」，着重後肢力量，為順利傳宗接代唔好「發軟蹄」，會特別將食物放高啲，等樂樂企高鍛煉肌肉。
而旅發局公佈去年訪港內地客跌3%，海洋公園今個農曆年內地團亦有雙位數跌幅，但主席孔令成昨日同傳媒聚會時話，人少咗未必唔好，因為排隊快啲，行得舒服啲，回頭客都多啲。佢又提到去年人均消費多咗一成，印度市場升三成咁多。