近年好多歌手都會北上參加歌唱節目，賺人仔兼人氣，據知，容祖兒會以踢館歌手身份，加入湖南衛視《我是歌手4》歌唱比賽節目，每集勁收150萬人仔天后級酬勞，PK好友李克勤爭第一！
「輸贏唔重要」
噚日克勤喺微博貼出同祖兒嘅合照洩密：「下一站……我帶路……不過角色好像有點不一樣……」兩人由拉斯維加斯出發，消息指兩人原來飛到長沙為今晚節目錄影，據知祖兒為揀唱邊首歌諗咗好耐，最後決定唱《我的驕傲》嘅國語版《揮着翅膀的女孩》出戰，希望唱自己嘅歌可以旗開得勝。
本報向祖兒經理人霍汶希求證，佢承認：「其實《我是歌手》搵咗祖兒好多年，節目好有誠意邀請佢參加，之前祖兒因為要做演唱會時間難配合，又猶豫自己係咪可以勝任，因為今集有好朋友克勤一齊，克勤又不停勸佢參加，所以祖兒最後都答應，佢覺得輸贏唔重要，最想挑戰自己。」
有粉絲估到祖兒參加《我是歌手4》，留言鼓勵打氣，之前克勤唱張學友歌曲《遙遠的她》奪第一，今次有強敵祖兒加入，網友鬼馬留言：「李生，到時在賽場請全力以赴，不要手軟兼心軟哦。」
撰文：馮仁昭
