中國公佈1月M2增長14%，唔係乜嘢好消息或壞消息，而係冇眼睇嘅消息。中國M2增幅每年保持13%至14%，但與此同時，中國保七不成（仲未計7%增長充滿水份），進出口仲要負增長，所以M2目前14%增幅，絕對遠遠泡沫過前幾年嘅14%，呢個係中央為免金融體系爆煲，開印鈔機開到停唔到嘅證據。前一期講到，中國M2喺2009至2015年之間，爆升超過兩倍，但貨幣供應實際上係過度擴充咗幾多？如果以2015年底同2008年底相比，撇除M2配合經濟增長、通脹嘅正常增加部份後，M2亦增長67.4%，呢個大概可視為貨幣供應非實質經濟所需嘅擴充部份。
雖然早年貿易賬逐漸開放，亦影響M2增長因素，但無可否認嘅係，中國印人民幣印到不能自拔，以後只會更誇張。A股有無限嘅人民幣供應去追逐，但H股只得有限嘅美金去買，所以兩者大幅度折讓絕對合理不過。不過，新供應貨幣轉眼間又製造新爛賬，最終又係冇財富效應嘅產生。
中長線嚟講，中資股再難有可觀股息回報，內銀派息亦只跌不升，H股基金越嚟越冇市場，外資基金自然遠離H股。
港股連彈兩日，噚日先升後回，收市升203點，但成交反而大過恒指升598點嗰日，反映沽家多過買家。稍後寧願轉吼有國際競爭力嘅股票，呢一刻陪跌，但遲早升得番。
晉佳
https://www.facebook.com/advanceguy1/