作為財經版報紙專欄，冇理由唔講吓個股嘅。領展（823）業績一向唔錯，近來股價跟市跌唔少，實在有啲睇唔過眼，冇可能一間長久以來管理咁有效嘅公司，股價係咁俾人沽嘅，呢度要為佢嘅股價講返幾句公道說話。
領展業績提到，以「連繫好生活」為宗旨，與不同持份者建立深厚關係，從而創造價值。我想說的其實是，領展，絕對做到了！我知你睇到呢度實想鬧我㗎，但我冇講大話，因為領展完完全全達成業績入面嘅「三大使命」。
一：優質服務、物有所值
領展近年業績年年向上，至今年9月底止半年，收益同埋每基金分派單位，都齊齊升約一成，條數真係唔錯，仲開拓埋上海市場！
交到數，仲開埋新market，但領展員工數目竟然按年可以少咗約2%！你話，領展員工為公司提供嘅服務，係唔係非常優質！
好啦，重點嚟啦，到底物業組合遍佈香港、北京、上海嘅領展，總共有幾多員工呢，答案係：936人！嘩！1,000人都冇，就支持到呢間市值超過980億元嘅上市公司，即係平均一個人值1億元！長和（001）3,600億市值，近27萬員工，平均每人員係值約130萬元，領展呢班員工，仲唔係「物有所值」？
二：共同創造、持續發展
唔係呀化，得900幾人，就幫晒咁多個商場街市，做晒管理清潔全包宴，單係請保安都唔止啦？！come on james，對公司來講，有一種幸福叫「外判」。外判有幾好，為領展帶來幾多效益，睇一睇條數你就明。
領展半年業績，香港物業組合按年係冇變化，咁理論上，物業管理嘅人手應該都係差唔多。不過，業績都提到，上年5月起，最低工資加咗8.3%，由原來時薪30蚊加到32.5蚊。OK，神奇嘅事發生了！就係上半年物業管理人費用、保安及清潔嘅開支，只係加咗3.3%咋！你話，咁係咪證明外判管理公司，擁有超卓嘅管理能力？有冇cut人？邊個知？who cares，外判搞掂咪得！領展與外判，就咁樣，成功創造奇蹟，持續發展。
三：結伴社區、合作無間
你有眼見啦，屯門良景邨街市承包商建華「判上判」，喺社區團體請一班無牌「管理員」趕小販；長發邨街市檔販罷市，建華又即時搵到班來歷不明嘅人頂檔，仲要賣得勁平，為街坊「服務」。好啦，咁建華係乜嘢來路，其實聽到「建華」呢兩個字，都知唔係好嘢。話說建華作為管理商，當然有權控制租金價位，但呢間公司背後嘅話事人，全部本身都係做豬肉生意，仲係領展嘅商販之一。
咁即係點？簡單來講，就係順我者昌，逆我者亡。領展「結伴社團，合作無間」，領展去得咁盡嘅公司，視公司形象如無物，仲要獨大，有乜可能唔賺錢？所以，睇好領展，全因為賤！
千頌C
http://fb.com/winbigwok
本欄逢周三刊出C