英超已經完成26周聯賽，李斯特城仲排榜首，前鋒占美華迪亦以19個入球排英超射手榜第一，想唔做球星都唔得啦。做球星就要有球星嘅排場，同李城續新約有7.5萬鎊（約85萬港元）周薪合約嘅華迪，就買架靚車獎勵自己，用咗16.8萬鎊（約190萬港元）購入新款賓利房車（圖），仲用自己個名自訂埋車牌「J9 VDY」，慌死球迷唔知架車係佢嘅。