由去年底病到𠵱家嘅工聯會立法會議員麥美娟（圖），噚日完全失聲，卻堅持要喺立法會政制事務委員會議上，質詢個人資料私隱專員黃繼兒。麥美娟一出聲已經「聲出驚人」，聲沙到一個極點，人哋係要豎高隻耳仔，先至聽到佢講乜嘢，連黃繼兒答問題嘅時候，都忍唔住祝佢早日康復。
麥美娟話傷風感冒底一直未清，但把聲一直都冇事，直至周日情人節，單身嘅佢走咗去屯門街站，企咗兩個鐘同街坊講「恭喜發財」之後，把聲開始唔掂，晚上再來一杯紅酒加白酒，終於成把聲無晒。
噚日人人一聽到佢講嘢即時叫佢「收聲……你唞吓啦」，可見嚴重程度。佢話唔敢戴口罩，「因為戴埋口罩，冇人會聽到我講乜」。