踏入2月，日yen升勢嚇死人地強勁，究竟只係短暫一chok定還是「激安」完畢長期轉升，市場未有共識。
日yen會唔會就此正式由長期跌勢轉為長期升勢，要睇三個因素。第一，危機mode市場情緒中期會唔會持續落去？第二，當然要睇吓美國呢輪加息周期玩完未？第三，日本央行嘅寬鬆貨幣政策達到極限未？
上述問題筆者雖然唔可以實牙實齒地回答，但從技術分析方面就見到一啲提示。技術分析預示，美元兌日yen會由長期升勢轉入長期跌勢，亦即係日yen本輪自2011年底開始嘅大跌浪即將告終。
事關由2014年底開始，美元兌日yen已經形成咗一個頭肩頂型態，預示美元兌日yen見頂，只不過呢個型態至今尚未完全成晒型，仍然爭緊後抽嗰一下。
升至116水平或回落
最近美元兌日yen升番少少，技術上如果美元兌日yen繼續向上，並且喺升到116左右嘅水平就掉頭回落，上述頭肩頂型態便正式完成，亦反映美元兌日yen呢輪長達三年半嘅升勢，好大機會就此告終。
倘若美元兌日yen短期內嘅技術走勢真係如上所述般一樣，咁就反映咗環球投資者對於危機嘅憂慮繼續揮之不去，亦顯示投資者相信，美國中期大手加息嘅機會極低。
另外，雖然市場現時憧憬日本央行會出手干預日yen的升勢，但筆者仍然傾向認為，喺買債規模差唔多到達極限嘅情況下，除非日本央行真係諗到一個好創新嘅寬鬆措施，否則將難以匹敵宏觀力量對日yen滙價嘅支持。
El.
本欄逢周二、五刊出