鄉議局新界西同新界東兩大龍頭，元朗十八鄉委會主席梁福元同上水鄉委會主席侯志強噚日同傳媒新春茶敍，當然講咗唔少有關組黨嘅問題，但大家焦點卻落喺梁府兩棵金花茶樹，今年60歲肖猴嘅侯志強仲好猴擒，想掘咗棵茶樹走。
梁福元噚日喺大棠屋企宴請傳媒，大部份食材都係自家種嘅有機蔬果，好似士多啤梨、番薯等，連飲嘅金花茶都係自己種，原來佢係廣州華南農業大學校友，調理農務確好耍家！所以佢囝囝元朗區議員梁明堅都喺旁邊恭聽。
梁：組黨戙支旗，鄉民就歸隊
金花茶原產地係廣西、越南一帶，梁福元話有降血脂、血糖功效，十分珍貴，三高人士飲多兩杯無妨，仲話內地𠵱家都被炒熱，近年叫價仲越來越高㖭！侯志強唔單只金睛火眼，仲一度話要搵在場嘅朋友幫手掘一棵返去自己屋企種㖭喎！八方上網睇過，供種植嘅金花茶樹苗，都係由人仔幾十蚊到幾百蚊都有交易，對侯志強嚟講濕濕碎，莫非佢好葡萄近萬呎嘅大宅連花園用地，故此喺梁府上動土？
講番組黨，梁福元話近年丁屋、僭建等問題，唔少村民被告上法庭，政府成日蝦村民無錢打官司，搞到民怨越來越大，所以先有組黨壯大新界人嘅聲音，佢計過嘞，鄉事派連同鄉郊地區嘅區議員有60、70人，但以往都分散喺建制政黨，𠵱家鄉事派有兩成人左右有政黨背景，若然鄉議局呢個「大祠堂」戙支旗，大家都要歸隊，笑言若有人唔退其他黨，「鄉民都會叫你食蕉啦」。八方聽聞組黨一事，新界王劉皇發同發仔意見不一，發叔同建制關係良好，但發仔就對組黨蠢蠢欲動，據聞連鄉議局秘書處都大換血，建立自己馬房㖭！
李八方
mailto:[email protected]
