成年人生活忙碌，但捐血就義不容辭。紅十字會噚日話上年有26萬幾人次捐血，按年升2.8%；有506,441袋血液製品，按年升0.87%。但首次捐血嘅人得3.8萬人，跌4.9%；跌得最嚴重係後生仔女，16歲首次捐血組別得7,109人，跌足3年，比前年跌四分一。
紅十字會輸血服務中心行政及醫務總監李卓廣估計，因為大部份中學將時間安排晒上堂，所以冇時間畀紅十字會。莘莘學子要面對沉重嘅公開試，又真係未必有心情去捐血。佢話今年16歲夠秤捐血嘅人會有成5.4萬人，係近3年最多，所以喺fb、ig等平台推行「千禧捐血新型人」活動，希望佢哋養成恒常捐血習慣喎。