2月28日舉行嘅立法會新界東補選，因為一場旺角騷動而令選情風起雲湧，更令市民金睛火眼贒實選戰，睇吓不同派別會否有景轟。
噚日有讀者向八方報料，話調景嶺港鐵站嘅太興餐廳服務員幾乎清一色戴住一條孭帶、上面寫住「請投票」同圈住2號。咦，調景嶺位於新界東，讀者質疑餐廳係幫緊補選嘅二號候選人黃成智助選，懷疑違規助選！
八方了解後發現，職員身上條孭帶只係宣傳太興最近一個電視廣告主角大賽，Eric Kwok同音樂人Ray C.係候選人，太興所有分店都化身票站，鼓勵一人一票選出廣告主角。
點解大部份職員都戴2號？其實咁啱啫，有職員話自己鍾意邊個就戴邊個，呢位讀者可以放心咯！補選候選人仲有方國珊、楊岳橋、梁天琦、梁思豪、周浩鼎同劉志成。