廖創興銀行創辦人廖寶珊家族第三代成員廖偉麟（Jeffrey），舊年以個人名義成立物業投資公司正八集團，事隔一年，Jeffrey話集團舊年回報有30%，成績算係唔錯，今年有機會投地做埋發展商。
Jeffrey之前一直跟媽媽廖湯慧靄與舅父湯文亮一齊管理紀惠集團，直至舊年先至自立門戶。佢話，正八呢個名，係嚟自佢爸爸──廖烈正，因佢爸爸排名第八，所以各取一字叫正八。正八只會參與短炒同分拆出售項目，唔會好似紀惠咁持有物業長線收租，彼此角色冇衝突。
正八舊年投資額達10億，今年預算15億，初步打算用四成投資寫字樓、三成舖位。Jeffrey今年比較睇好寫字樓市道，見租金上緊，價錢應該有得升；舖位如果繼續跌價，佢就會入市。
Jeffrey近排亦有留意地皮價錢，覺得最近賣出嘅深水埗地抵買。如果有適合嘅地皮，佢亦會拎3、4億元買入，小試牛刀，發展低密度住宅，市區或新界都冇所謂咁話。