美國總統選舉近期進行得如火如荼，到底美國人應該支持熱門人選希拉莉，還是牙擦擦嘅特朗普？美國對沖基金大鱷艾克曼（Bill Ackman）上星期就喺《金融時報》發表專欄文章，指上述兩位都選唔過，紐約前市長彭博先係最佳人選。
艾克曼呢篇文章一出，即刻被人鬧爆，唔係鬧佢支持彭博，而係話佢連自己個基金都打理得唔好，就冇謂咁多口水，咁高調去講政治喇。翻查資料，艾克曼旗下基金Pershing Square舊年虧損20.5%，今年兩個月唔夠又唔見18.6%。
美國有唔少對沖基金經理當政治係一種嗜好，不過大家嘅共識係，基金有錢賺，你先至可以講嗜好，蝕錢時，唔該你專心搵投資回報，就算要講政治都唔好咁高調。艾克曼今次完全揀錯時間去撐彭博囉。