雖然噚日港股彈升近600點，不過大家都係唔好開心住，事關業績期剛開始，銀行股條數備受關注，依賴內地生意嘅公司業績又唔荒好得去邊。咁係呢個時候，炒開股嘅股民有乜好做呢？惟有搵藉口炒囉。
好似「魔童」王維基旗下香港電視（1137），噚日3點左右開始被挾高，最多升兩成，不過成交金額唔多，全日成交900萬元都冇，只算係乾挾，收市報1.35元，升15%。事後周圍搵原因，唯一發現王基維噚日朝早喺佢自己facebook上載咗一張開會相，寫住「開始名古屋三重縣之旅！」
可能大家真係冇嘢好炒，見王維基去日本開會，憧憬佢會為網購生意帶來乜嘢好消息或者新產品。王維基上月先至講過，今年計劃再擲1億元為網購做推廣，𠵱家去日本開會，可能有人唔理咁多，短炒咗先算喇。