政府銳意發展大嶼山，發展局局長陳茂波噚日就帶隊同傳媒環遊大嶼山，仲喺大澳地道飯店蓮香酒家食飯。原來波叔無論因為工作抑或旅遊，都嚟過大澳唔少次，蓮香酒家就係佢嘅飯堂之一，極力推介嗰度嘅蝦醬豬肉，話肉質肥美，好鬼惹味，席間有人講笑話呢碟係茂波推介蝦醬豬肉，局長可以做埋生招牌。唔通大澳繼特色小食「蝦豬餅」之後，又有另一特色菜「茂波肉」？波叔又講起日前情人節點過，話原本打算訂大澳文物酒店同太太過二人世界，可惜已經訂滿，最後同幾對老友夫婦一齊食飯過節。