保安局指魚蛋革命淡化暴亂，黎局長跟唔識打三條九的吳局長咁熟，有冇短訊問吓佢，月睇三十本書，應該實識得用升級名堂，替政府強化「暴徒」之惡。簡體都得喎。大家幫吓手做民調，睇睇市民點揀。
魚蛋革命，支持度甚高，因為MK是魚蛋之區，美食天堂，魚蛋革命，高度米芝蓮feel。旅業已經走下坡，無理由唔做番啲嘢。局長，去豉油街篤兩串咖喱魚丸子試吓，唔會有人以彈代蛋滾你的。
磚頭運動，動感之都，配合到爆。拋磚引肉，話說警隊前線暴怒，提出20項不滿，認為伙記被署方跣了一鑊，做了一晚磚頭人肉盾。查實警隊考核必須做到N下引體上升，fit到漏油，應付磚頭綽綽有餘，何必妄自菲薄呢。掟磚那方，除了那位防暴隊員，也有臂力驚人的奧運奇才。控以暴亂罪時，務請袁司長考慮減刑，改判入港隊效力，田徑項目，有機會攞牌！
魚蛋與磚頭，重外國傳媒口味。最香港自己友風的，還是689之亂，最對路！最切題！還聯想？香港人成全689，讓他名留青屎吧！