假設你有一千萬美金喺未來20年投資，股、滙、債同商品中任揀一種資產，問20年後嘅價位，你最想知道乜嘢？
美國經濟學家Tyler Cowen最近喺佢嘅Blog貼出呢條「思考題」，多數人最想知道20年後美股表現、蘋果同Google嘅股價或樓價表現等。但Tyler Cowen話冇人答啱。佢解釋，若手上只有20年後資產價格一項資料，根本不足以作長線投資。
外圍市況同大家「開年」，資金流入黃金避險，金價上周四升穿每盎斯1,263美元，年內累升17%。黃金備受追捧，反映投資者對負利率等貨幣政策不滿。
對沖基金等大戶持有黃金長倉合約增加，錄得13.01萬張合約（截至2月9日），連升6個星期。對上一次大戶押注金價升係四年前，當時現貨金價約每盎斯1,500美元水平飆至1,700美元水平。估計金價今次升浪未咁快完，本周要睇實日央行會唔會出手干預日圓，同內地復市後表現。
除關注黃金ETF外，實金例如金幣亦屬保值之選。美國鷹揚金幣單計今年1月賣出12.4萬盎斯；歐洲舊年掃走175萬枚奧地利金幣，比金融海嘯多四倍。
Captain Cool
本欄逢周一刊出