昨日除咗係年初七人日，亦係甜蜜蜜嘅情人節，民建聯立法會議員蔣麗芸宴請傳媒到佢屋企拜年。喺呢個浪漫節日，蔣麗芸嘅丈夫梁海明亦有孖住一齊亮相，仲喺傳媒面前向老婆獻上深情一吻，錫錫面珠墩，反而平日好豪邁、對住泛民冇有怕嘅元秋，對老公飛擒大吻卻有啲靦腆，仲一直迴避向丈夫獻吻做回禮，流露咗元秋少有嘅怕醜一面噃！
既然同老公咁鬼sweet，有傳媒就請教元秋，喺覓偶同維繫愛侶關係方面有乜心得？元秋話呀，搵伴侶應該搵比自己年長10年喎，點解呢？原來佢覺得，無論老妻少夫或者少妻老夫都好，大10年就有一定人生經驗兼經濟基礎，一定可以幫到另一半喎！（但佢老公同佢年齡相距都冇10歲，大過佢一年咋喎……）
如果老公偷食唔會嘈
若然老公偷食，又點算？元秋會唔會即時施展獅吼功嚇窒老公先？大家如果咁估就錯嘞。元秋話呀，如果喺街見到另一半拖住其他人，佢唔會出聲，只會喺心裏面嬲，皆因佢覺得如果嘈交，對一段關係無好處，所以佢會扮演避風港嘅角色，相信只要做到一個好避風港，個老公最後都會返嚟嘅！分享完擇偶兼相處貼士，佢其後應邀獻唱一曲鄧麗君嘅《八個娃娃》，原來佢喺90年代曾喺無綫現場活動表演此曲，佢噚日一邊播片，一邊清唱，唱功寶刀未老。
李八方
mailto:[email protected]