【本報訊】今年9月的立法會換屆選舉，新界東勢陷入激烈混戰。民主黨前成員、新界東前立法會議員鄭家富坦言「仲有團火」，積極考慮再戰新東，強調泛民要在立法會有個民生議題的代表性人物，並指新民主同盟范國威可與他同區各自出戰。當年反對超級區議會方案的他更指，新同盟不妨挑戰超級議席，即使會遭翻舊賬也毋須介意。
記者：姚國雄
退下火線4年，今年56歲的鄭家富接受本報訪問時稱，9月有意再戰新東，自稱「仲有團火」，希望有生之年再做議員，「希望能做到一屆、甚至多一屆嘅話會更好」。他指雨傘運動後年輕人冒起，但議會總不能全是年輕人，要有他這類中生代、有議會經驗的人參與。
2012年放棄角逐連任，鄭家富指當時對分組點票有無力感而退下火線。4年後，分組點票仍在，鄭的無力感亦依舊，但他指已休息「充電」，而且忍受不了傳媒找議員回應他熟悉的交通問題時，淪落至找建制派議員：「高鐵問題，傳媒都係搵田北辰，跟住仲要搵埋嗰個陳恆鑌，令人覺得泛民都要有個民生嘅代表性人物，今屆立法會近乎失色，我越睇就覺得越唔抵。」
倡新同盟出戰超選
新東篤定混戰，泛民多張名單勢分薄票源，鄭家富認為，他能夠填補民主黨劉慧卿、公民黨前成員湯家驊等領導人物退出後的市場。被問及去年區選無論泛民和建制的「大佬」落馬，證明政治明星非保證，鄭指：「我唔係馮檢基、我唔係何俊仁，我同佢哋年齡相差10年，如果選民覺得我應該out，我一定尊重、接受。」
至於被形容是其徒弟的范國威，鄭稱過去4年已給機會范表現，范在本土問題做出特色，故即使與范同區出戰，與范的票源未必重複，反而可互補不足，甚至稱范可轉戰超級區議會：「點解新同盟有15個區議員，唔搵人出嚟選？例如（區選票王）任啟邦或者范國威戰超選，令到新民主同盟能夠壯大。」
鄭家富與新同盟當年反對超級區議會方案退出民主黨，新同盟若戰超選是否有違原則？鄭認為沒法子，因制度已改變不了：「政治要計算喺議會上攞到幾多實力，我反對超級區議會，但佢繼續存在，就要加入去，然後喺分組點票抗衡傳統功能界別，我都認為咁樣（參加超選）可能會俾人鬧，但真係冇辦法，因為地區直選冇出路。」
當年民主黨支持超選受盡批評，如今各方卻「有位齊齊搶」，鄭不同意此說：「咁樣講咪即係只有民主黨可以參加（超選）？唔係咁㗎嘛。」他指新同盟參選會有「陣痛」受批評，建議改派沒有民主黨背景的新人參加。