加拿大時間上周六，去咗多倫多Ricoh Coliseum睇東、西岸明星練波，一次過滿足晒多個願望，見到湖人球星拜恩（Kobe Bryant）、勇士後衞史堤芬居里同熱火後衞獲迪（Dwyane Wade）一班球星。
飛人牌賣通宵
好似小記呢類球迷，夢想係見到球星真人；但另一類擁躉，成日幻想自己同球星們並肩作戰。NBA官方商店就幫到你！Ricoh Coliseum入面有一間，小記睇完練波之後都去參觀吓，發現一批好特別嘅波衫，只係印有「EAST」同「WEST」，冇號碼又冇球員名，但都照有人買喎。初頭以為搵笨，同sales傾完之後，先知呢批波衫可以即時印上號碼同自己個名，半個鐘搞掂，價錢同其他明星賽波衫一樣，連稅135加幣（約760港元）。着上身就好似做咗明星球員，仲唔係夢想成真！
講起波衫，梗要講埋波鞋。上周五多倫多嘅Jordan Brand旗艦店開張，頭幾日通宵營業，小記都去咗見識吓，點知條龍由商場內排到出街，唔好忘記當時氣溫係零下22度，由此可見飛人牌喺當地幾受歡迎。唔怪得另一間商場內嘅Foot Locker，未計稅要265加元（約1,491港元）嘅AJ30只賣剩五對，sales話過埋呢日肯定冇貨㖭。