噚日香港飛馬同標準流浪喺青衣運動場踢聯賽盃B組賽事，吸引咗東方教練「牛丸」陳婉婷入場，點解嘅？因為呢場波對東方好重要，如果出現3:1、4:2等「默契戰果」，兩隊就會一齊打入四強，踢走東方；結果流浪以1:1逼和飛馬而首名出線，次名就係東方。
流浪同東方齊出線
開賽前三個半鐘先同澳門踢完友賽嘅流浪，今場踢得好被動。20分鐘，飛馬中堅艾華度接應利馬角球頂入領先1:0；流浪喺39分鐘由許嘉樂出個靚波畀卓耀國頂入，呢個亦係阿國近五場第五個入波。下半場飛馬狂攻都入唔到波，最終兩隊踢成1:1，流浪同東方出線，飛馬就出局。
賽後陳婉婷話：「今場以平常心去睇，始終自己改變唔到啲咩。兩隊踢得好積極，係一場好波。」飛馬教練李志堅就指：「球隊踢得進取、好積極，但把握唔到。」流浪喺盃賽嘅成績好過港超，主帥列卡度就唔覺得係因為球隊踢得好啲，只係因為好運。至於同日另一場A組分組賽就係「例行公事」，傑志大勝夢想駿其3:0。