旺角騷亂中大部份被捕者被控以暴動罪，呢條罪行近年罕見，但其實1966年反對天星小輪加價觸發嘅九龍騷亂中，曾有人被控相關罪名。當年發起運動嘅香港社運先驅蘇守忠（圖）已出家為曜樂法師，噚日佢出席一個講座時講到旺角騷亂，話冇人會希望事件發生，擔心會令旅客減少，「自己企喺中國嘅土地，冇理由想佢亂」。
身穿僧人服飾嘅蘇守忠喺講座大談國際局勢，八方原本想問佢點睇旺角騷亂，但佢話已接受另一傳媒訪問，婉拒受訪，即使有觀眾提到，佢亦只係回應兩句，但講到中美局勢就眉飛色舞，批評美國恃美元強勢好霸道，係超級爛仔，相信有輪迴，認為美國會有報應，又質疑點解奧巴馬會攞到和平獎，「習近平做咁多好事，佢就有資格攞」。