本欄在二月五日談及崇基師弟黃志煒逆市擴張，增開三間「曲奇薈」門市店，一間在中環萬年大廈，一間在銅鑼灣小巴站，一間在尖沙嘴K11，皆貴租地區也，賣曲奇餅而付貴租，勇氣可嘉。去年零售市道疲弱，全年零售總值回復至2012至2013年間嘅水平，但人工及租金就冇跌過，以此推論，零售業今年幾難捱，因四月開始，一簽多行全部取消，令好多內地人士無法子即興來港一遊，兼且日圓大跌，日本環境靚，服務好，價錢平，一比較，內地人去東京大阪勝過來香港多多聲啦。
零售業會唔會因此裁員呢？一位權威人士話：「唔似噃，到目前為止，零售業嘅長期僱員（長工）好穩定，過往幾年根本難以請人，唯有周圍搵人兼職，如果真有需要，都係送走啲兼職先啦。」呢位權威人士係一個高級貨高價貨集團嘅總裁，在零售業打滾多年，左丁山冇資格質疑佢嘅睇法啫！佢話地舖多屬於個別個人業主，願意減租，但大型高檔商場仍然要加租，想減租呀，唔該讓開，出面有人排緊隊入場！
聽完權威人士之言，打電話再問黃志煒有乜把炮連開三間分店？佢話：「無他者，計過晒數，因我地大部份顧客，到目前為止，並非內地遊客，反而外國東南亞日本遊客就有幫襯，內地遊客減少，對我地無甚影響，不過梗係要勤力拼搏贏口碑啦！」唔，創業之道，要有謀有勇，勇即勤懇工作，一字咁淺啫。
一位崇基校友睇完二月五日本欄，對左丁山講：「喂，我跟李冰老師學唱歌，黃志煒亦然，李老師嘅先生係李景雄牧師，前崇基校牧牧師，並非歌唱老師！」左丁山即刻向黃志煒查證番，佢當然證實此事，不過已故李冰老師的丈夫李牧師，為黃志煒嘅新店開幕領唱聖詩及領禱，好唔話得。順帶一提，李景雄牧師今年已經80幾歲，李冰女士幾年前去世後，李牧師成立一個「李冰聲樂發展基金」，「香港失明人協進會」管理，支持有音樂天份之失明人士在音樂領域發展，另外李冰老師生前秉承母親意願，早已成立「李朱淑鈞教育基金獎勵計劃」，獎勵失明優秀學生讀書，一位曾經獲得呢個獎學金嘅著名學生就係已經入讀中大，主修繙譯嘅新亞師妹曾芷君，如李冰老師者，可謂遺愛在人間，唔怪得咁多學生懷念佢！