上周六澳職上演墨爾本打吡戰，墨爾本城喺主場迎戰墨爾本勝利，賽前受讓平/半似乎幾筍，佢哋喺上半場表現亦相當似樣，烏拉圭前鋒科拿路利（左）好似上晒身咁，梅開二度幫墨城半場領先2:1，佢亦喺近八場澳職第七場有波入；易邊後變咗勝利嘅世界，古希美喺47分鐘就扳平，佢喺55分鐘本來可以梅開二度，主射罰球個波中楣後明明過晒白界，但球證都係冇判入，結果墨城喺下半場捱打下保住2:2，贏半個盤執番身彩。
同日另一場澳職，近排勢頭唔錯嘅珀斯光輝就再贏一場，作客FC悉尼由一對前鋒安迪基奧治同夏朗特各建一功下，以2:1擊敗對手。再攞多三分之後光輝已經連贏四場，係咁執分，喺季初曾經跌過落榜尾嘅光輝，𠵱家有機會爭季後賽席位。