乜嘢叫做超級球星？湖人嘅拜恩就係最佳例子！
喺加拿大時間上周五朝早11點半開始，東、西岸明星就見傳媒。小記提前45分鐘去到會場，已經有唔少傳媒朋友喺度準備，仲有快艇射手列迪克（J.J. Redick）現身，同埋超過五名記者霸定個靚位。
風趣好波先係真男神
小記心諗：「使唔使咁誇呀？」點知轉個彎，不得了咯。眼前一張大枱，被不下20位記者圍住，仲未計攝影師，原來張枱係Kobe接受訪問嘅地方。小記梗係即時攝番個靚位啦，之後仲越嚟越多人㖭，有阿根廷、德國、日本同台灣等嚟自世界各地嘅新聞機構；去到12點已經有成幾十人，仲多過勇士後衞史堤芬居里嗰枱。
記招開始後先係戲肉，Kobe每答完一條問題，四周圍就會有人大叫「Kobe」，呢個經歷真係有今生冇來世。而呢位西岸明星都好識做，逐一解答大家嘅問題，連意大利文同西班牙文講埋。最搞笑係當Kobe被問到全明星賽首次喺加拿大多倫多舉行嘅感覺，佢就只用一個「凍」字形容；識搞氣氛、打波勁、贏過五次總冠軍，package咁好，呢啲咪男神囉。
小記夜晚仲去咗加拿大航空中心睇新秀挑戰賽，呢個場館六層都有舖頭賣波衫同tee，但最吸引小記嘅係三分賽專用的money ball，靚女sales話係限量發售，每個要80加元（約450港元）。