高洪波接任中國國家隊主帥，不過喺下月尾世盃外圍賽對馬爾代夫同卡塔爾之前，已經安排唔到熱身賽，惟有安排集訓練兵。國足喺上周五進行高洪波再次上任之後嘅第一次集訓，高帥任命張琳芃為國足新隊長，呢位廣州恒大守將當年第一次入選國家隊，都係高洪波做主帥，「張莫斯」都好感激高帥支持，呼籲球員要搏老命踢好下個月兩場波。