邊個門將最勁？你可能揀英雄輝，佢又可以揀四師弟。歐洲著名足球雜誌《法國足球》最近就公佈咗歷史最佳門將嘅評選結果，由意大利門神保方獲得最多票數當選（圖），至於第二位就係98年法國贏世盃冠軍功臣、光頭門將巴夫斯。始終都係法國媒體搞嘅投票，有唔少自己友支持，有咁高位置都唔奇怪。
巴夫斯竟壓耶辛列次席
《法國足球》喺球壇有一定地位，幾年前國際足協仲未將歐洲同世界足球先生合併之前，代表歐洲足球先生嘅歐洲金球獎，就係由呢份雜誌選出。球壇長青樹保方喺95年就喺意甲帕爾馬冒起，最威水時刻梗係喺2006年帶領意大利贏世盃冠軍，遺憾係喺歐國盃同歐聯都只係屈居亞軍。保方喺呢個歷史最佳門將評選獲得44%選票；至於第二位嘅巴夫斯得票率就有17%，呢位已退役嘅光頭門將，曾經效力過馬賽、摩納哥同曼聯，雖然身手了得，但不時又會蝦碌犯錯，表現都幾神經刀。
評選並列第三嘅係前蘇聯門將耶辛同埋德國嘅簡尼，各有7%支持；同保方一樣仲係現役球員嘅卡斯拿斯同埋紐亞，就各得6%選票。