早前阿富汗小朋友因為着咗美斯嘅背心波衫，於是一夜成名，如果佢件衫唔係印住「Messi」，而係印住馬斯真蘭奴，仲有冇人報道呢又？
韋斯咸啱啱同皮耶續約，周薪係創球會新高嘅125,000鎊，皮耶有幾好，睇過都知道，有佢表演魔術咁嘅腳法，下年個新奧運球場就唔怕剩低太多位嘞，不過當比歷都喺記者會話皮耶係陣中最好嘅球員，咁行嘅講法，你當我係阿富汗小朋友咩？
喺家陣崇尚主見嘅年代，跟大隊代表冇意見，行另類反而係有角度，要畀人知你識波，一般都唔會作出錦上添花式評論，講咗等如冇講嘅sound bite係註定被遺忘嘅。正如過年同朋友吹開Adele，話佢啲歌好聽簡直係冇講嘢，話佢首《Hello》好有感情亦怕你out，「首《When we were young》 好有feel」 就有番些少時代感，若果嫌 Adele 太年輕而你準備去睇Madonna的話，都唔好淨係聽見《Like a virgin》先識得跟住郁，識得哼兩句《Borderline》至係忠實，話晒呢首先係娜姐第一首上榜歌嘛。
比歷哥哥，皮耶位已上，係時候谷下其他二三線嘅主打啦，比我揀一定揀占士哥連斯（圖）嚟讚，今屆佢由副選變正選，光頭佬留羊咩鬚，人賣技佢賣命，你讚佢一句佢肯定十倍奉還；兼且仲可以刺激埋其他自以為好波過佢嘅隊友，喺隔籬NBA咁識敬老嘅年代，足球世界好應該識得尊重老人家囉。
聽歌聽side track，睇波睇綠葉，係一種要求；亦係一種享受，可以冷眼睇住蟻民隨波逐流，有諗過度過嘅睇法就算未必個個認同，起碼對得住自己。當人人追捧奧斯爾，你可以期待路斯基；人人喊打，你不妨捍衞賓迪基。唔想被時代淹沒，不妨預測今屆英超不是李斯特城，而係……（自己填唔該）。
KEYMAN
節目主持