兩個星期前（一月三十一日），新亞校友賽馬團體隻新馬「一片光明」出賽，事前曾在陸羽飲茶，夥計問是否搏殺，左丁山話新亞校友鬥志鮮明，「一片光明」逢出必搏，最緊要有運氣就贏得，一於用「一片光明」做膽拖「旺財生暉」、「連利進寶」及「真心意」三隻馬。哈，果然就係如此排隊返嚟，呢四隻馬組成嘅四連環派彩得66元，熱到燙手，可知道全港馬迷、馬評人眼光非常銳利！
新亞院長黃乃正教授並非馬迷，嗰日啱啱有空，計好時間在下午五時前入到沙田馬場捧「一片光明」，跑完就走，另外中大校友評議會主席陳志新是日剛從首爾回港，下午班機一到埗就飛車入沙田，剛好趕及，與黃奕鑑、阮德添、張志剛等新亞校友齊齊拉頭馬，好不開心。
贏完本來想俾隻馬休息一段時間嘅，事關呢隻三歲馬去年一月尾來港，至今啱啱一年加半個月，出賽八次，得三冠三亞一季，只落第一次，邊個做馬主都應該感謝幸運之神，收貨啦。之不過，練馬師話隻馬正處於九成勇態，可乘氣勢追擊，於是又試報名今日出場，仍然跑千二米，照計好有機會，應在三甲之列。但係老友記吳嵩不止一次講過，三歲馬負頂磅（133磅）係一個大負擔，對住啲年長輕磅馬，十分蝕底。「一片光明」就是如此，平時體重不夠一千磅，三歲輕身馬負133磅上陣，蝕上加蝕，取勝把握冇上次咁大噃。
有憂亦有喜，今日「一片光明」嘅對手有一啲曾是蹄下敗將，餘下馬匹睇唔到有邊一匹會係「飛廉之子」「發盈喜」「人民武士」呢類級數嘅馬（按：上述三隻皆贏過「一片光明」），仍有勝出機會，臨場要靠世界冠軍騎師莫雅發揮咯。
為想知道多啲「一片光明」嘅取勝機會，特登問吓著名馬評人、崇基肄業生余伯樂，點知呢位馬場才子唔講馬，講對聯，傳來一對舊聯，話係新春遊戲喎，可惜左丁山唔識玩呢個遊戲呢？一位聯友曾出上聯考余伯樂：「收二川，排八陣，六出祁山，七擒孟獲，五丈原竪起四十九盞明燈，一生只為酬三顧」，上聯顯然係講諸葛亮。余伯樂對以下聯：「穿花徑，繞荷池，櫻鋪富士，蓮慰敦頤，芙蓉鎮空栽梅蘭菊竹殊色，柳絮何曾繫藕絲。」時值新春，看了余伯樂下聯，幾乎想立即去太子道西花墟！