一個又一個講求意頭的名字密密麻麻塞滿馬經，年輕時阿安（化名）和Nancy（化名）其中一個拍拖活動，就是由女方在馬經上隨意一圈，讓男方下注，但熱戀時的甜蜜互動，最終埋下分離的種子。隨著阿安榮升父親後愈賭愈烈，多賺「奶粉錢」的良好意願，以欠債纍纍收場，慶幸Nancy一句「離婚」，讓賭至麻木的阿安驚醒，「好傷心，明明自己好錫屋企，點解會搞成咁呢？」
記者 袁柏恩
阿安18歲已隨友人賭馬，賭仔講「彩頭」，拍拖時，他間中請Nancy「指點迷津」，Nancy現時回想：「唔識架嘛，咪求其揀個好啲嘅名囉，贏左喎，佢個心態咪會覺得『得喎，原來咁都贏到喎』。」兒子出生當天，阿安以其出生日期下注三重彩，贏得數萬元，更令他「心雄」，「贏到錢喎，可以拎返屋企喎。」
「賭錢可以幫補家計」的想法，由是植入阿安腦袋，賽馬日進投注站成為指定活動，每次下注千多元至數千元，「諗住贏多啲幫屋企，但從來都幫唔到屋企。贏唔係好多又諗住再贏多啲先拎返屋企，但都輸埋。」雖然阿安每月出糧後，還是立刻把家用交給Nancy，惟餘款幾乎全用作賭注，期後更走上借貸賭博的不歸路。
Nancy第一次發現阿安欠債時，兒子還牙牙學語，兩口子正供樓，新手媽媽3份兼職，阿安亦有正職和兼職，家庭月入兩萬多元，Nancy以儲蓄還債。第二次，再來一張10多萬元的欠單，Nancy看着阿安一臉自責，咬緊牙關，向親友借貸填數。
第三次，Nancy決定提出離婚，二人冷戰數個月，「嗰次真係好嬲，嬲到出手打佢。」期間10歲兒子說要以零用錢替爸爸還債，阿安終清醒，「想彌補番，本身自己都賭到無咩感覺，只係不停跑數咁。」
相愛逾廿載，兩人終決定一同走下去。Nancy最先向戒賭機構尋求協助，阿安乖乖聽從，接受輔導，Nancy坦言，初時每次開信箱時仍感恐懼，「就算係銀行宣傳單張，我都真係驚。」為免阿安心癮起，賽馬日換成家庭日，一家繞路不經投注站，Nancy戒掉火爆性格，學習聆聽和體諒，「當時諗，如果想改變佢，我要先改變自己。」阿安亦上教會、每周踢足球等，以行動力證自己改變。
阿安現已戒賭約3年，Nancy走出信心陰霾，「大家重新再相處過。我成日覺得如果要維繫大家感情，又經歷咁多嘢，係要珍惜嘅，重新再投入大家嘅感情囉，以前拍拖嘅嘢再做番一次。」二人現在不時抽空二人世界、重遊熱戀時的舊地。阿安更會做蛋糕哄Nancy，「係好甜蜜嘅。」阿安戒賭後的情人節，Nancy終可甜蜜地笑。
戒賭查詢，可電東華三院平和坊熱線：28274321。