【本報訊】香港社區組織協會幹事吳衛東昨聯同10位露宿者，與民政署助理署長鄭重慶及深水埗民政專員莫君虞於南昌社區中心閉門會議，檢討露宿者政策。會前露宿者代表提交請願信，要求政府停止滋擾露宿者、改革避寒中心開放指引、重設中期宿舍、制訂露宿者政策及取消公屋單身人士計分制，協助露宿者上樓。
質疑政府做騷
吳於會議後指對政府回應感失望：「我哋主要嘅3個訴求，第一係保障露宿者唔會俾洗地、圍板嘅行政行為滋擾，但政府冇任何回應。第二，雖然政府承諾檢討避寒中心政策，例如開放時間、中心地點，但佢哋又冇檢討時間表。」
吳亦覆述指民政署短期內無計劃設中途宿舍，更直言助理署長鄭重慶對避寒中心「唔係太熟悉」，「佢以為深水埗避寒中心喺1月有10幾日24小時開放，其實得特首嚟嘅三日係咁。究竟政府係嚟做騷定關心露宿者？如果真係關心就更應該要有露宿者政策，而唔係過去4年用盡方法令露宿者居住情況更加困難。」
■記者葉偉東