雷神莫雷拉本月3號策騎「得意財星」入最後直路之際驚險墮馬，疑似被馬匹踢傷，好多人擔心佢會重傷，殊不知佢稍事休息之後，初三賀歲賽復出，竟然大開殺戒贏四場，兼且勝出「澳斯卡」捧走重頭戲賀年盃。
不過唔係個個好似雷神咁福大命大，四位本地騎師之前就因為晨操或賽事期間意外受傷，包括賴維銘右膝斷骨鑲螺絲、蔡明紹右膝韌帶受創、蘇狄雄左手手指骨裂、女將蔣嘉琦墮馬右手兩隻手指骨裂，四個全部已經缺陣幾個月零收入，好似已被馬迷遺忘。
不過其中蘇狄雄就傳來好消息，他說：「其實現在已康復八九成，我下個禮拜三再覆診，希望星期四可以騎番馬，操番兩個禮拜後出賽。」
至於嘉琦妹康復進度比蘇狄雄更佳，已經恢復操馬，今朝更策騎「創出商機」勝出試閘，據知可望於本月21日賽事復出上陣。不過著名評馬人積奇直言嘉琦妹面臨重重挑戰，他說：「睇佢應該係一個幾硬淨、幾有鬥心嘅人，稍後復出應影響不大，但佢畢竟係女仔，喺現在競爭咁激烈環境之下，要闖出名堂唔係咁易。」
至於早前只能全職湊女的蔡明紹，亦已大致康復開始操馬，預計下月可出賽。最慘係賴維銘，依然銷聲匿跡，仍然養緊傷。